🛕 இராஜராஜேஸ்வரம் என்ற தஞ்சை பெரிய கோவில் - 1

🌷 இராஜராஜ சோழன் பற்றி அறியாதவர்கள் மிக குறைவு.

 

🌺 தனது ஆட்சியில் ஒரு போரில் கூட தோற்காத வீரப்புலி.

💐 பதவியேற்ற சில வருடங்களிலேயே தனது தூதனை அவமதித்து சிறையில் அடைத்ததால் சேர மன்னன் பாஸ்கர ரவிவர்மன் மற்றும் அவனுக்கு உதவியாக வந்த பாண்டிய மன்னன் அமர புயங்கன் இருவரையும் தோற்கடித்து மும்முடி சோழன் என்ற பட்டம் பெற்றவர்.

🌸 முழு இலங்கை தீவையும் கைப்பற்றியதோடல்லாமல்,  மாலத்தீவுகள் வரை புலிக்கொடி பறக்க வைத்தவர்.

👑 தில்லையில் அறையில் பலவந்தமாக பூட்டப்பட்டு கரையான்களின் புற்றாகவே மாறிப்போன சைவ திருமுறைகளை பெரும்பாடு கொண்டு வெளியிலெடுத்து " திருமுறை கண்ட சோழன் " என்ற பெயர் பெற்றவர்.

                 மேலும் கோவில்களில் ஓதுவார்களை பணியில் அமர்த்தி தமிழ் மறை நாடெங்கும் பரவ வழிவகுத்தவர்.

💎 " பின்வரும் காலத்தில் கவிநாடு ஏரியை யார் பராமரிக்கிறார்களோ அவர்களின் பாதத்தை என் தலையில் ஏந்துவேன் " என கல்வெட்டில் பதித்து மங்கா புகழ் அடைந்தவர்.

🛕 இப்படி பல சரித்திரப்புகழ் பெற்று இருந்தாலும் இராஜராஜன் பெயரை சொன்னவுடனே நினைவுக்கு வருவது தஞ்சை பெரிய கோவில் தான் என்றால் மிகையாகாது.

🍁 பிற்காலத்தில் மல்லப்ப நாயக்கரின் திருப்பணிக்கு பின்னர் பெருவுடையார் ( பெரிய + உடையார் ) என்றும், 

                 அதுவே சமஸ்கிருதத்தில் பிரகதீஸ்வரர் (பிரஹத் (மஹா (அ) பெரிய) + ஈஸ்வரர்) என்றும் இரண்டுமே பெரிய லிங்கம் என்பதை பொருளாக கொண்டு பிற்காலத்தில் வழங்கப்பட்டதே தவிர, உண்மையில் இராஜராஜேஸ்வரம் என்பதே அதன் பெயர்.

🌻 இராஜராஜசோழனின் பெருமுயற்சியால், தலைமை தச்சரான குஞ்சரமல்ல இராஜராஜ பெருந்தச்சரின் கைவண்ணத்தில் உருவானதே பெரிய கோவில் 

✨ காஞ்சிபுரத்தில் இராஜசிம்ம பல்லவன் அமைத்த கைலாசநாதர் கோவிலை கண்டு வியந்த இராஜராஜன் "கச்சிப்பேட்டு பெரியதளி" என மனமாற புகழ்ந்தான். அதுவே தஞ்சை கோவிலை கட்டிட இராஜராஜனை தூண்டி இருக்க வேண்டும் என்கிறார் குடவாயில் பாலசுப்ரமணியன்.

🌷 பொதுவாகவே தமிழர்கள் கலைக்கும், பக்திக்கும் அன்று பெரும் முக்கியத்துவம் கொடுத்தனர் என்பது மறுக்க முடியாத உண்மை 

🌺 கி.பி 642-ல் வாதாபியை வென்றபின் பல்லவர்களின் கொடி தமிழகத்தில் கொடிகட்டி பறந்தது 

                 பல்லவர்களின் கலைத்திறனுக்கு மாமல்லன் (மல்லர்களுக்கெல்லாம் மல்லன் ) என்றழைக்கப்பட்ட முதலாம் நரசிம்மவர்மன் அமைத்த மாமல்லபுரமே சாட்சி 

🌹 கி.பி. 879 -ல் ஆதித்த சோழன் காலத்தில் திருப்புறம்பயம் போரிற்கு பின்னர் சோழர்கள் தலைதூக்க துவங்கினர்.

                 திருப்புறம்பயம் போரில் வென்றவுடன் அங்கிருந்த கோவிலையும், திருச்சிக்கு அருகில் இருக்கும் திரு எறும்பீஸ்வரர் கோவிலையும் கற்றளியாக மாற்றினான் முதலாம் ஆதித்த சோழன்.

                 அவரது மகனான முதலாம் பராந்தகனே தில்லைக்கு பொன்வேய்ந்தது.

🌺 இராஜராஜனின் தந்தையான சுந்தர சோழர் காலத்தில் கட்டப்பட்டதே இன்று திருச்சி - மதுரை நெடுஞ்சாலையில் இருக்கும் கொடும்பாளூரில் அமைந்த மூவர் கோவில் ஆகும்

                 மேலும் திருநல்லூரில் இருக்கும் கார்கோடகேஷ்வரர் மற்றும் மீஞ்சுரில் உள்ள வரதராஜ பெருமாள் கோவில் இரண்டுமே இக்காலத்தில் கட்டப்பட்டவை தான் 

🍀 அவ்வாறே இராஜராஜ சோழனின் வழியில் அவரது மகனான கங்கையும், கடாரமும் கொண்ட இராஜேந்திர சோழன் கங்கை கொண்ட சோழ புரத்தை நிர்மாணித்தார்.              

 ( 1836 - ம் ஆண்டில் ஆங்கிலேயர்கள் இக்கோவிலின் மகா மண்டபம், முகமண்டபம் என பலவற்றை இடித்து அந்த கற்களை கொண்டு கொள்ளிடம் ஆற்றில் கீழணை கட்டினர் )                                                  

                 அவ்வழியிலேயே இரண்டாம் இராஜராஜன் தாராசுரம் கோவிலை கட்டினார் 

(பெரிய கோவில், கங்கை கொண்ட சோழபுரம் மற்றும் தாராசுரம் இவை மூன்றும் Great Living Chola Temples என UNESCO - வால் பாரம்பரிய இடங்கள் பட்டியலில் சேர்க்கப்பட்டது)

💐 இவையெல்லாம் உதாரணங்கள் தான் பக்தியில் சிறந்த மன்னர்களால் எண்ணற்ற கற்றளிகள் கட்டப்பட்டு பல நூற்றாண்டுகள் கழித்தும் நிற்கின்றன

🌹இவ்வளவு ஏன் தேவாரம் பாடிய அப்பரும், சம்பந்தரும் 7ம் நூற்றாண்டிலும், சுந்தரர் 9ம் நூற்றாண்டிலும் வாழ்ந்தவர்கள். அவ்வகையில் அவர்கள் பாடிச் சென்ற ஆலயங்கள் அனைத்துமே ஆயிரம் ஆண்டுகளுக்கு மேலான பழமையானவை தான் 

🛕பாடல்பெற்ற ஸ்தலங்கள், கற்றளிகள் என தமிழகத்தில் பல கோவில்கள் இருந்தாலும் தஞ்சை பெரிய கோவில் தனி இடத்தை பிடித்தது என்றால் மிகையாகாது 

தஞ்சை பெரியகோவிலை பற்றி அறியாதவர்கள் மிக குறைவு அதன் ஆச்சர்யங்களை விவரிக்கும் ஒரு சிறு தொகுப்பே இது 

இனிவரும் பதிவுகளில் தஞ்சை பெரிய கோவிலை பற்றி  பார்க்கலாம் 

அடுத்தடுத்த பதிவுகள் 👇👇

கட்டுமானம்

கலைநுட்பம்

நிர்வாகம் மற்றும் செல்வம்

முடிவுரை